《Too old to handle》
最近生活都歸於平淡，程仔返工放工，我就買餸洗衫煮飯整餅打理屋企。雖然結咗婚只係三年，以前都會出去飲下酒、去餐廳約會下，捉住青春嘅尾巴，但最近呢種生活就令人感覺好似一下子老咗幾十年咁。
有一晚食飽飯，我哋如常開住電視。睇住Netflix新節目《Too hot to handle 》入面一班碧波蕩漾鳩揈揈嘅年青人，喺唔同人嘅感情同肉體間周旋。一時喺海邊搽太陽油，一時喺營火旁蒙眼濕吻，刺激到人心臟快要停頓。
我一方面慶幸自己唔係同阿爸阿媽睇緊呢個節目（以前唔小心同奶奶一家睇過《Blue is the warmest color》，舐撚過嘢。），另一方面又開始覺得自己老了，無論係皮膚彈性同浪漫程度都回不去了。「我哋已經老夫老妻喇，加上年紀開始大，好難再有啱啱一齊熱戀期嗰種感覺，永遠都唔會好似電視班人咁過癮。你會唔會好羨慕佢哋呀？」我邊摺住剛乾好嘅衫，邊扁住嘴咁問對電視目不轉晴程仔。
程仔即刻按下遙控器上嘅暫停按鈕，應該係一秒鐘都唔想錯過呢個節目。佢托咗托反晒光嘅眼鏡，摸咗我頭一下，笑住話：「一段感情唔同階段就好似一日間唔同時段嘅景色咁，日出、中午、黃昏、星空都各有各燦爛，你唔會比較㗎嘛。唔羨慕呀，同你一齊我好開心。」語畢，程仔繼續用震驚摻雜愉悅嘅眼神去欣賞呢套學術性咁高嘅節目。
仲要只係第一集，已經咁激，我心諗屌你老味有撚排捱。但見呢排佢返工咁大壓力，難得佢睇到咁驚喜連連，又解釋得咁有創意，所以我都深感安慰。決定倒杯啤酒，放下自卑同自我，陪佢睇埋一份。
或者所有關係無論再激再熱情，最終都會慢慢冷卻落嚟，唔再Too hot to handle。但老夫老妻間獨有嘅一份「你快樂所以我快樂」會一直淡淡哋、甜甜哋咁溫暖人心。
特別鳴謝：好朋友F之前幫我哋影嘅靚相。📷
Instagram : @sis3ter
Search